Nikoliqi tërheq vërejtjen e rrezikut nga gjenocidi

Tomisllav Nikoliq tërheq vërejtjen se serbët në Kosovë jetojnë nën kërcënimin e gjenocidit...Foto 1/1

Tomisllav Nikoliq tërheq vërejtjen se serbët në Kosovë jetojnë nën kërcënimin e gjenocidit dhe se çdo përpjekje e imponimit të njohjes së institucioneve kosovare mund të ndikojë në eksodin e tyre.

“Çka nëse shpërngulen serbët? Kush do t’i pranonte rezultatet e një gjenocidi të tillë? Ky është njëri nga definicionet e gjenocidit – kur i ndiqni 40.000 njerëz, pa marrë parasysh a janë gra apo burra (civilë apo ushtarë) dhe kur e ndryshoni përbërjen etnike të territorit. Ky është gjenocid”, tha Nikoliqi në një intervistë dhënë gazetës britanike “Gardian”.

Kryetari i Serbisë theksoi në Londër se ekziston rreziku që Prishtina të tentojë të shkojë kaq larg. “Forcat e vetme të armatosura atje, përveç atyre të bashkësisë ndërkombëtare, janë ato shqiptare. Jam i bindur se kjo nuk do t’i pengonte aspak që këtë hap ta ndërmerrnin menjëherë”, publikohen në sajtin e “Gardian” fjalët e Nikoliqit. Kryetari i Serbisë shtoi se vetëm prania e forcave të NATO-s po e pengon një aksion të tillë të Prishtinës.

Nikoliqi paralajmëroi qëndrimin e tij sa u përket bisedimeve Beograd- Prishtinë e që do të jetë një qëndrim më i fuqishëm se ai i pararendësve të tij, duke theksuar se deri më tash lëshime dhe kompromise janë kërkuar vetëm nga Serbia në përpjekjet për ta zgjidhur kontestin dhe se tash duhet të kërkohen më shumë lëshime nga Prishtina.

Nikoliqi i bëri thirrje kryetares së Kosovës, Atifete Jahjaga, që ta pranojë realitetin se kurrë më nuk do ta qeverisë pjesën veriore të Mitrovicës. I pyetur se a nënkupton kjo që Kosova duhet të ndahet, kryetari i Serbisë u përgjigj se nuk e di, ngase po t’i thoshte dikush para 20 vjetësh se nuk do të ketë më Jugosllavi kurrë nuk do të besonte, sikur që nuk do të besonte kurrë për ndarjen e Serbisë me Malin e Zi, transmeton Radio Kim.