Xhami e veçantë për ceremonitë mortore

Në afërsi të varrezave të Qytetit në Mitrovicë me ndihmën e një biznesmeni turk...Foto 1/1

Në afërsi të varrezave të Qytetit në Mitrovicë me ndihmën e një biznesmeni turk nga Inegoli , është mundësuar realizimi i projektit për ndërtimin e një xhamie që do të shërbej enkas për ceremonitë mortore në Mitrovicë.

Në përurimin e këtij objekti përveç kryetarit Avni Kastrati, kanë marrë pjesë drejtues të
Komunës së Inegolit, të prirë nga kryetari Alinur Aktash, mandej ministri Mahir Jaxhillar,
përfaqësues të Këshillit të Bashkësisë Islame etj.

Kryetari Kastrati, i ka falënderuar miqtë dhe donatorët turq në emër të qytetarëve për
ndihmën që po japin për Mitrovicën dhe gjithë Kosovën. “Xhamia e ndërtuar këtu është një
objekt i veçantë në gjithë Kosovën, meqë është projektuar enkas për ceremoni mortore”.

Ai sqaroi se në këtë xhami do të kryhen të gjitha ritet fetare, si pastrimi i kufomës, mandej
ruajtja dhe të gjitha ritet tjera që lidhen me ceremoni të tilla. “Miqësia dhe bashkëpunimi
ndërmjet dy shteteve tona, Kosovës dhe Turqisë dhe në këtë rast Mitrovicës dhe Inegolit,
po reflektohet në krijimin e mundësive dhe kushteve më të mira për jetë”.

Shumë i lumtur për këto projekte që po realizohen në Mitrovicë u shpreh edhe kryetari i
Komunës së Inegolit, Alinur Aktash, i cili për dy ditë ka qëndruar në Mitrovicë i shoqëruar
nga bashkëpunëtorë, biznesmenë dhe përfaqësues të komunitetit shqiptar atje. “Jemi shumë
të kënaqur që shohim këto projekte që po realizohen në të mirë të qytetarëve të Mitrovicës,
me të cilët kemi një miqësi dhe bashkëpunim shumë të ngushtë”.