Trepça do ia shesë xehet kompanisë zvicerriane

Mitrovicë - Mbledhja e fundit e Bordit të drejtorëve të Agjencisë Kosovare të Privatizimit...Foto 1/1

Mitrovicë - Mbledhja e fundit e Bordit të drejtorëve të Agjencisë Kosovare të Privatizimit ia dha dritën e gjelbër menaxhmentit të “Trepçës” që të zhbllokojë procesin e shitjes së koncentratit.

Tenderi për shitjen e koncentratit minerar i shpallur më 5 mars të këtij viti ishte anuluar më 24 prill. Dy ditë
më vonë Bordi i AKP-së ka marrë vendim që t’ia lejojë këtij gjiganti të dikurshëm metalurgjik shitjen e lëndës
së parë minerare, proces ky që i është bllokuar që nga fillimi i vitit.

“Trepça” tani do t’ia shesë fituesit të tenderit kompanisë “Glencore International” nga Zvicra, pesë mijë tonë
xehe të plumbit dhe zinkut.

Ferat Shala, drejtor menaxhues i “Trepçës”, ka thënë se në bazë të vlerësimit të komisionit të kombinatit,
kompania “Glencore” është shpallur fitues për blerjen e xeheve. Por ai ka lënë të hapur përcaktimin final për
fituesin e mundshëm të tenderit.

Koncentrati i plumbit që prodhon “Trepça” përmban rreth 70 për qind plumb të pastër, ndërkaq koncentrati i
zinkut përmban më pak se 50 për qind zink.

Sipas kontratës, gjatë vitit të kaluar kompania zvicerane “Glencore” i ka blerë xehet e “Trepçës” me
vlerë prej 1 mijë e 562 dollarëve amerikanë për ton të koncentratit të plumbit, dhe 500 dollarë për ton të
koncentratit të zinkut.