Unmiku: Shtëpitë e rindërtuara do të rrënohen

Mitrovicë - Administrata e UNMIK-ut në veri të Mitrovicës ka kërcënuar sërish shqiptarët...Foto 1/1

Mitrovicë - Administrata e UNMIK-ut në veri të Mitrovicës ka kërcënuar sërish shqiptarët që po i rindërtojnë shtëpitë në pronat e tyre, që të mos e bëjnë këtë, sepse ato do tu rrënohen.

Fevzi Beqiri, nënkryetar i Këshillit të Lagjes “Lagja e Boshnjakëve”, bëri të ditur se inspektori serb në Administratën e UNMIK-ut në veri të qytetit, Aleksandër Baraq, ia ka dorëzuar Rexhë Avdiut në “Lagjen e Boshnjakëve”, vendimin për ndërprerjen e punëve, përkatësisht rrënimin e asaj që është bërë deri tash  në ndërtimin e shtëpisë në pronën e tij, e cila ka filluar këto ditë  e që është donacion i dhuruar në mbrëmjen humanitare kushtuar Mitrovicës “Ndihmo edhe ti”.

Përfaqësuesi i UNMIK-ut ia kishte lënë Rexhë Avdiut edhe vendimin tjetër për rrënimin e shtëpisë së Remzi Zeqirit, që poashtu është duke u ndërtuar falë donacionit nga mbrëmja humanitare “Ndihmo edhe ti”dhe gjendet në të njëjtën lagje.

 Është interesant, se administrata serbe e UNMIK-ut vendimet i ka dorëzuar aty ku duhet, por emrat e pronarëve i kishte gabuar.

Me vendimin e shkruar në gjuhën shqipe, por me shumë gabime,  të datës 22.06.2012,ata  urdhërohen që në afatin prej 48 orësh të rrënoj objektin banesor, me arsyetim se nuk ka leje ndërtimi nga administrata e UNMIK-ut.

Tutje në vendim thuhet se nëse ata nuk veprojnë sipas vendimit, atëherë ekzekutimi i vendimit të bëhet me dhunë. Ndonëse si këshillë juridike në vendimin është dhënë mundësia e ankimimit në afat prej 30 ditësh, aty thuhet se ankesa nuk e ndalon ekzekutimin e tij, pra rrënimin e shtëpisë.

“Ne tashmë jemi mësuar me veprime të këtilla kërcënuese e shantazhuese  që e kanë mbështetjen e plotë të UNMIK-ut, andaj këto vendime nuk na bëjnë fare përshtypje. Ne jemi të vendosur dhe të përkushtuar që të qëndrojmë në pronat tona dhe ta ruajmë këtë pjesë të Kosovës nga spastrimi i mëtutjeshëm. Na nevojitët vetëm mbështetja dhe ndihma e institucioneve lokale dhe qendrore të Kosovës”, ka thënë Beqiri.

Ai kërkon që Qeveria e Kosovës të angazhohet edhe më shumë në ndërtimin e objekteve shumëkatëshe në “Lagjen e Boshnjakëve” dhe në lagjet tjera veriore. Kjo sipas tij është e domosdoshme, në mënyrë që të kthehen të gjithë shqiptarët e dëbuar me dhunë dhe të vazhdojnë jetën e tyre aty ku më parë kanë jetuar.
Që kjo të ndodhë dhe me qëllim të ndërpritet përfundimisht shitja eventuale e pronave nga ana e shqiptarëve, thotë ai, Qeveria e Kosovës duhet t’i blej vetë këto prona nëse ka të tilla dhe patjetër duhet të mundësoj punësimin e nga një anëtari të secilës familje që jeton në lagjet veriore e që nuk e ka asnjë të punësuar.