KIPRED: Kosova duhet të kërkojë normalizimin e marrëdhënieve me Serbinë

Kosova po hyn në periudhën kur mbaron faza e mbikëqyrjes së pavarësisë e ndarë përbrenda,...Foto 1/1

Kosova po hyn në periudhën kur mbaron faza e mbikëqyrjes së pavarësisë e ndarë përbrenda, kurse në raportet ndërkombëtare si shtet gjysmë-legal, për ç’arsye duhet të kërkojë normalizimin e marrëdhënieve me Serbinë, vlerësoi Instituti i Prishtinës për Hulumtim dhe Zhvillim të Politikave (KIPRED) në raportin e botuar sot.

Autorët e raportit – Ilir Deda, drejtor i institutit KIPRED dhe Shpend Kursani, hulumtues i lartë në këtë institut – konstatojnë se kremtimi i përfundimit të mbikëqyrjes së pavarësisë do t’i zbulojë problemet reale të Kosovës. E këto probleme janë, para së gjithash, çështja e veriut dhe fakti që pavarësinë e Kosovës nuk e kanë njohur të gjitha vendet e Bashkimit Evropian, për ç’arsye, siç theksojnë analistët, Kosova duhet të kërkojë normalizimin e marrëdhënieve me Serbinë.

Pra, KIPRED-i konstaton që Bashkimi Evropian në ndërkohë nuk ka gjetur mënyra që ta përfshijë Kosovën në agjendën e përfaqësimit evropian, për shkak të pesë anëtarëve të tij që nuk e kanë njohur Kosovën.

“Për shkak të pamundësisë që t’i bindë anëtarët e vet për ta pranuar Kosovën, BE-ja nuk mund ta shfrytëzojë plotësisht ndikimin e vet në Prishtinë, kështu që Kosova ka mbetur në pozitë që të kërkojë normalizimin e marrëdhënieve me Serbinë, me shpresë që këto marrëdhënie të reja t’i bindin këto vende të BE-së për ta ndryshuar qëndrimin ndaj statusit Kosovës”, thuhet në analizë.

Në analizë theksohet se pjesa veriore ende mbetet, de fakto, e ndarë, gjë që, siç theksojnë hulumtuesit, e rrezikojnë edhe vetë suksesin e arritur në jug, transmeton Blic.