Ivanoviqi: Do të jetë verë e nxehtë në Kosovë

Mitrovicë – Sekretari shtetëror në Ministrinë për Kosovën, Oliver Ivanoviq, vlerësoi...Foto 1/1

Mitrovicë – Sekretari shtetëror në Ministrinë për Kosovën, Oliver Ivanoviq, vlerësoi se Kosovën e pret një verë e nxehtë, ku do të ketë ende incidente sporadike.

“Me anë të dialogut ne po e mbajmë nën kontroll situatën, e cila është e tensionuar dhe pritet të shpërthejë në çdo çast, në formën e ndonjë incidenti, gjë që nuk është në interes të askujt”, tha Ivanoviq në RTS.
Ai vlerësoi se situata mund të mbahet nën kontroll vetëm nëse vazhdon dialogu dhe përkujtoi se në bisedimet e ardhshme ka tema të vështira për t’u diskutuar, siç është telekomi, të cilat, ndonëse duken si biseda teknike, kanë edhe konotacione politike.

“Kosova nuk është shtet, andaj nuk mund të ketë numër të posaçëm të telefonit. Është shumë me rëndësi që ta zgjidhim çështjen e operatorëve tanë mobilë dhe fiks, ngase kjo është shumë e rëndësishme për qytetarët tanë”, tha Ivanoviq.

Duke i komentuar paralajmërimet e disave se Bashkimi Evropian dëshiron që ta aranzhojë një takim të kryetarit të Serbisë, Tomisllav Nikoliq, me kryetaren e Kosovës, Atifete Jahjaga, dhe që Serbia ta hapë një përfaqësi të saj diplomatike në Kosovë, Ivanoviqi theksoi se kërkesa të tilla zyrtare nuk ka, transmeton B92.

“Takimi i dy kryetarëve do të ishte një njohje indirekte dhe unë mendoj se ne nuk jemi të gatshëm që të futemi kaq thellë në këtë çështje”, tha Ivanoviq dhe shtoi se kjo është ajo vija e kuqe, të cilën nuk guxojmë ta kalojmë.