Dh. Hoxha: Qeveria e Kosovës e gatshme të takohet me serbë

Këshilltarja e kryeministrit kosovar Hashim Thaçi, Dhurata Hoxha, ka deklaruar se Qeveria...Foto 1/1

Këshilltarja e kryeministrit kosovar Hashim Thaçi, Dhurata Hoxha, ka deklaruar se Qeveria e Kosovës është e gatshme që të takohet me përfaqësuesit e serbëve të veriut të Kosovës.

Hoxha theksoi se këta do të mund të ishin edhe kryetarët e tanishëm të komunave, nëse ata zgjidhen për përfaqësues nga vetë serbët. Hoxha deklaroi kështu gjatë paraqitjes së raportit të Zyrës Civile Ndërkombëtare (ZCN). Raporti i ZCN-së është si rezultat i konsultimit me qytetarët, me rreth 100 serbë, të cilin e ka zhvilluar ZCN në Mitrovicë. “Për herë të parë po dëgjohet zëri i një grupi solid dhe i përfaqësuesve të serbëve që jetojnë në veri të Kosovës”, thuhet në raport.

Në raport konstatohet se serbët e veriut nuk kanë mekanizma të pranueshëm e të dëshirueshëm, të cilët do t’u mundësonin shprehjen e interesave të tyre dhe thuhet se situata në terren nuk do të ndryshojë derisa të mos ndryshojë mendimi dhe qëndrimi i Beogradit. Në këtë raport theksohet se Qeveria e Kosovës duhet të bëjë maksimumin që t’ia shtrijë dorën komunitetit serb në veri, me qëllim të integrimit sa më të shpejtë të tyre në shoqërinë kosovare. /Kim Radio/