Petroviqi: Zyra në Mitrovicë, në shërbim të qytetarëve

Zëvendëskryeministri i Kosovës dhe ministri i Pushtetit Lokal, Sllobodan Petroviq, flet...Foto 1/1

Zëvendëskryeministri i Kosovës dhe ministri i Pushtetit Lokal, Sllobodan Petroviq, flet për “M-Magazine” për sfidat lidhur me veriun e Kosovës.

Është paralajmëruar hapja e Zyrës Administrative në Mitrovicë. Cili do të jetë funksioni i saj – teknik apo politik?
Unë disa herë e kam potencuar natyrën teknike e jo politike të kësaj zyre. Ajo do të krijojë, para së gjithash, kushte më të mira të sistemit ndaj qytetarëve të veriut të Kosovës, përkatësisht të pjesës veriore të Mitrovicës. Zyra do të shërbejë edhe si trup që do të investojë dhe do të mbikëqyrë përmirësimin e infrastrukturës dhe zbatimin e projekteve të tjerë zhvillimor në pjesën veriore të Mitrovicës dhe në gjithë veriun e Kosovës. Kam pasur rastin të dëgjoj dhe të lexoj nëpër gazeta deklaratat e disa individëve që jetojnë në veri të Kosovës, të cilët hapjen e kësaj zyre e quajnë provokim. E shfrytëzoj rastin që të them këtu se nuk shoh kurrfarë arsyeje për një interpretim të tillë. Kjo zyrë ka një qëllim e ky është përmirësimi i jetës së qytetarëve në pjesën veriore të Mitrovicës, që nënkupton zhvillimin ekonomik të kësaj pjese të Kosovës.

Pse mendoni se hapja e kësaj zyre do të jetë një hap i suksesshëm kur dihet se tashmë 13 vjet hapat e tillë kanë dështuar vazhdimisht?
Mua nuk më kujtohet asnjë nismë e ngjashme, mirëpo konsideroj se kjo zyrë do të ketë sukses, ngase po hapet në kohën kur po zhvillohen bisedime në Bruksel, të cilat bisedime, shpresoj sinqerisht, do t’i kristalizojnë marrëdhëniet në Kosovë e në këtë kuadër edhe në veri të vendit. Ne dëshirojmë që t’u dalim krah qytetarëve për të gjitha nevojat që ata kanë dhe që t’ua lehtësojmë jetën e tyre të përditshme. Unë nuk kam thënë asnjëherë se çdo gjë lidhur me këtë zyrë do të shkojë lehtë, por e di me siguri se në jug të Ibrit nismat e tilla dhe kjo formë e bashkëpunimit u ka ndihmuar qytetarëve që jetojnë në komunat e sapokrijuara, andaj një gjë e tillë dëshiroj të ndodhë edhe në veri. Është rrugë e gjatë kjo, mirëpo edhe një herë dua ta nënvizoj – nuk do të ketë kurrfarë detyrimesh të dhunshme e as kërcënimesh. Dëshiroj që qytetarët ta kuptojnë se kështu është dhe kështu do të jetë. Njeriu i parë i kësaj zyre do të jetë në rangun e kryetarit të komunës.

Sa do të ndahet buxhet për Zyrën Administrative në Mitrovicë?
Katër milionë euro, para këto që deri më tash investoheshin apo administroheshin përmes zyrës së UNMIK-ut.

Ajo me të cilën spekulohet këto ditë në media është administrata e UNMIK-ut në Mitrovicë dhe statusi i saj pas hapjes së kësaj zyre. A i është bërë kërkesë UNMIK-ut që ta mbyllë administratën e vet në Mitrovicë dhe çka do të bëhet me të punësuarit aty?
Para marrjes së vendimit nga ana e Qeverisë së Kosovës për hapjen e një zyre të tillë, jemi takuar me përfaqësuesit e të gjitha institucioneve ndërkombëtare që funksionojnë në Kosovë. Përveç tjerash, jemi takuar edhe me UNMIK-un, kam marrë pjesë edhe në takimet me EULEX-in, ICO-në, KFOR-in dhe në të gjitha këto takime kemi hasur në mirëkuptim dhe në gatishmërinë e tyre për të na mbështetur në këtë aktivitet. Ajo që është shumë e rëndësishme në këtë rast është mbështetja e këtyre institucioneve ndërkombëtare edhe në kuptimin praktik. Sa i përket pyetjes suaj konkrete lidhur me UNMIK-un, opinioni është i njoftuar se Qeveria i ka dërguar ftesë UNMIK-ut, mirëpo ende nuk ka ndonjë qëndrim zyrtar të këtij misioni lidhur me dorëzim-pranimin e kompetencave. Ata që eventualisht do të mbeteshin pa punë, do të mundë të konkurronin në zyrën administrative në pjesën veriore të Mitrovicës për të siguruar ndonjë vend pune.

Do të thotë ende nuk ka përgjigje nga ana e UNMIK-ut në kërkesën e Qeverisë që të mbyllet komuna e UNMIK-ut?
Është e vërtetë se para marrjes së këtij vendimi kemi pasur përkrahje nga UNMIK-u për ndërmarrjen e një hapi të tillë. Sa i përket rolit të mëtejmë të këtij misioni, përkatësisht shkurtimit të mandatit të tij, ata ende nuk kanë dhënë ndonjë përgjigje zyrtare, mirëpo ne jemi në kontakt të vazhdueshëm. Në periudhën që ndodhet para nesh do të kemi kontakte të shumta në nivel më të ulët, ku do të bisedohet, para së gjithash, për këtë sektor civil dhe mendoj se në këtë fushë do t’i gjejmë interesat e përbashkët.

A prisni problemi dhe të çfarë natyre me rastin e hapjes së kësaj zyre?
Gjithsesi procesi i decentralizimit është proces në veti, mirëpo pres që edhe popullata në veri të Kosovës të ketë vullnet të mirë dhe t’u japë rast të tjerëve që t’i tregojnë vlerat dhe përpjekjet e veta. Ne nuk kemi pasur rast deri më tash që të punojmë me të gjitha kapacitetet tona në veri të Kosovës dhe që të tregohemi se çka krejt mund të ofrojmë për popullatën e atjeshme. Do të ishte naive të mendohej se atje do të pritemi me qilima të kuq, por e di dhe do ta dëshmoj se përpjekja ia vlen, sidomos kur qëllimi ynë përfundimtar është mirëqenia e qytetarëve tanë që jetojnë në këtë pjesë të vendit.

Jo moti keni deklaruar se EK nuk i ka shfrytëzuar shumicën e parave të ndara për këtë rajon, ngase në veri të Mitrovicës i kanë munguar partnerët?
Askush nuk i ka zbatuar standardet që ka dëshiruar për shkak të gjendjes shumë të rëndë politike në veri. Kjo njëherësh shtrohet edhe si çështje se a e dëshirojnë qytetarët e veriut një izolim të tillë. Gjithsesi që këto çështje lidhen me njëra tjetrën dhe ky është një motiv më tepër për formimin e Zyrës Administrative, përkatësisht për realizimin e gjërave në veri dhe vetë ky fakt do të nxisë investime tjera nga ana e bashkësisë ndërkombëtare, mjete këto që do të investohen në veri të Kosovës.

A do të kërkoni takim me kryetarin e Serbisë, Tomisllav Nikoliq, në mënyrë që me të ta shtroni për bisedim problemin e Kosovës, përkatësisht problemin e veriut të Kosovës?
Nuk kam menduar për këtë në këtë fazë, ndonëse ne edhe si parti ia kemi uruar fitoren zotit Nikoliq dhe qytetarëve të Republikës së Serbisë për zgjedhjen e kryetarit të ri, me dëshirë që ta normalizojë situatën jo vetëm në Serbi por edhe në rajon. Pushtetarët e deritashëm të Serbisë janë deklaruar për mbrojtjen e interesave të serbëve të Kosovës, kurse pikërisht telashet që po na paraqiten rreth tabelave të regjistrimit tregojnë se sa shumë probleme kemi dhe ato nuk merren parasysh. Konsideroj që serbët edhe në veri e edhe në pjesët tjera të Kosovës duhet të bashkohen për t’i përfaqësuar bashkërisht interesat e veta dhe që ta tregojnë fuqinë e tyre politike. Mendoj se jemi ngopur me rrena dhe manipulime dhe se është koha që t’i bashkojmë kapacitetet intelektuale dhe të mendojmë më mençur. Por gjithsesi do të dëshiroja që qëndrimet e mia t’i mbroja edhe përpara kryetarit të Serbisë.

Çfarë hapash të mëtejmë politikë do të ndërmarrë Prishtina zyrtare lidhur me veriun e Kosovës pas hapjes së Zyrës Administrative në veri?
Prioritet numër një i kësaj Qeverie është implementimi i vlerave evropiane, përkatësisht i atyre vlerave që çojnë kah integrimi dhe ajo që është sfida më e madhe jo vetëm për Qeverinë e Kosovës por për çdo qeveri tjetër është përmirësimi i jetës së qytetarëve. Ajo që konsiderohet si një shans më shumë sa i përket veriut është pikërisht formimi i kësaj Zyre, e cila i paraprin komunës së re, e e cila do të ketë mundësi që jo vetëm në këtë fazë të parë kur punësohen 55 veta e më vonë edhe 30 të tjerë, por edhe më vonë, përmes këtij mekanizmi të krijojë mundësi investimesh më të mëdha përmes projekteve të shumta zhvillimore, jo vetëm për pjesën veriore të Mitrovicës por edhe për mbar rajonin të kontribuojnë në përmirësimin e jetës së qytetarëve, gjë që konsiderojmë se do të jetë edhe promotor i zhvillimit ekonomik për mbar Kosovën.

Jemi dëshmitarë të akteve të reja të dhunshme, që ndodhën lidhur me barrikadat, në të cilat u lënduan disa veta. U lënduan më vonë edhe disa ushtarë ndërkombëtarë. Si e vlerësoni këtë situatë?
Çdo lloj dhune është e papranueshme, pavarësisht se nga kush ushtrohet. Kjo e vështirëson jo vetëm realizimin e këtij projekti, por edhe realizimin e jetës normale të çdo qytetari. Mirëpo kam dëshirë të besoj se do t’i tejkalojmë sfidat aktuale dhe po ashtu dëshiroj të besoj se në të ardhmen e afërt do të kemi më shumë aktivitete të përbashkëta lidhur me disa projekte të përbashkëta, me të cilët do të ndërtojmë ura lidhëse e do t’i shembim barrikadat dhe urat ndarëse, të cilat më së shumti vështirësi po u sjellin njerëzve të zakonshëm që jetojnë në këto hapësira. Dëshiroj ta shfrytëzoj këtë rast që t’u bëj thirrje të gjithë atyre që kanë mundësi t’i kontribuojnë paqes dhe normalizimit të gjendjes që ta bëjnë këtë, ngase ky është interes i përgjithshëm, pra nuk është interes vetëm i një komune apo vetëm i një bashkësie etnike, por është interes yni i përbashkët.