Në Kosovë nuk vlejnë tabelat e vjetra serbe të regjistrimit

Zëvendësministri i Punëve të Brendshme i Kosovës, Sasha Rashiq, flet për...Foto 1/1

Zëvendësministri i Punëve të Brendshme i Kosovës, Sasha Rashiq, flet për “M-Magazine” për regjistrimin e automjeteve dhe për punën e zyrës të MPB-së së Kosovës në pjesën veriore të Mitrovicës.

Mitrovicë – Zoti Rashiq, për dy vjet në Qendrën për Shërbime Civile në pjesën veriore të Mitrovicës janë dorëzuar rreth 10.000 aplikacione. Sa serbë i kanë marrë dokumentet kosovare në këtë Qendër?
Është e vërtetë se që nga hapja e kësaj Qendre, pra më 2 korrik 2010, qytetarët i kanë parashtruar rreth 10.000 kërkesa për shërbime të ndryshme. Nga ky numër, rreth 80 për qind kemi të bëjmë me kërkesa të serbëve. Kërkesat kanë të bëjnë me lëshimin e dokumenteve të ndryshme kosovare, që nga pasaportat, letërnjoftimet, ekstrakte nga libri amëz i të lindurve e deri tek regjistrimi i automjeteve në KS apo RKS.

Sa vërtet kanë qasje qytetarët në Qendrën për Shërbime Civile?
Kanë qasje, ajo punon pesë ditë në javë dhe në të punojnë bashkërisht serbë dhe shqiptarë. Ajo që është me rëndësi është se ne këta njerëz që punojnë në këtë Qendër nuk i dallojmë për nga përkatësia etnike. Aty punojnë profesionistë, të cilët janë përgjegjës për punët e veta. Të punësuarit në këtë Qendër flasin shqip dhe serbisht, prandaj qytetarët sigurisht që duhet të jenë të kënaqur me shërbimet që u ofrohen në këtë institucion.

A do të lejohet prej 1 qershorit të dilet në komunikacion me automjete që kanë targa të vjetra serbe, të cilat i kanë shkronjat fillestare të qyteteve të Kosovës?
Të them menjëherë se vendimi për heqjen e tabelave të vjetra me prefiks të qyteteve të Kosovës është rezultat i dialogut në mes Prishtinës dhe Beogradit në Bruksel. Një ndër konkluzionet e këtij dialogu, që ka të bëjë me lëvizjen e lirë, është edhe konkluzioni që shoferët nuk mund t’i ngasin automjetet e tyre në Kosovë me tabelat e vjetra serbe. Ne në MPB-në e Kosovës kemi qenë fleksibilë dhe u kemi dhënë mundësi qytetarëve tanë që deri më 31 maj t’i regjistrojnë automjetet e tyre me shenjën KS apo RKS, me një ngarkesë minimale financiare dhe procedurale. Afati i fundit për regjistrimin e automjeteve ka qenë data 31 dhjetor 2011, mirëpo në pajtim me gjendjen në terren ky afat është shtyrë disa herë, kështu që afati përfundimtar për regjistrimin e automjeteve është 31 maji i këtij viti. Pra, nga 1 qershori, nëse shoferi përdorë tabelat e vjetra të regjistrimit e ndalet nga ana e policisë kjo do të konsiderohet kundërvajtje dhe do të sanksionohet në pajtim me ligjin në fuqi.

Cili është fati i lejeve të vozitjes që i lëshon MPB-ja e Serbisë për qytetarët që jetojnë në Kosovë? A do t’i konfiskojë policia edhe këto dokumente prej 1 qershorit e tutje?
Atë që e kemi konsideruar si nevojë dhe fakt është se 13 gjeneratave të shoferëve, pra që i kanë dhënë provimet për shoferë pas vitit 1999, do t’ua mundësojmë që me një procedurë të shkurtër të pajisen me leje kosovare të vozitjes e kjo do të bëhet në bazë të lejeve të vozitjes të lëshuara nga e organeve të Republikës së Serbisë. Do të bëjmë analiza përkatëse, por edhe pas një qershorit, nuk e dimë deri kur, do të shtyhet afati për ndërrimin e këtyre lejeve të vozitjes. Ajo që është me rëndësi është se qytetarët, krahas lejeve kosovare të vozitjes, mund t’i bartin edhe ato serbe, nëse kanë dëshirë.

Në çfarë mënyre do të zbatohet ky vendim në veri të Kosovës dhe a keni biseduar për këtë çështje me përfaqësuesit e EULEX-it, personeli i të cilit mision gjendet edhe në vendkalimet kufitare në Jarinje dhe Bërnjakë?
Unë personalisht nuk kam biseduar me përfaqësuesit e EULEX-it për këtë çështje. Kjo çështje është në kompetencë të Qeverisë së Kosovës dhe unë besoj se Qeveria, bashkë me ministrin përkatës, do të bisedojë në mënyrën më të mirë të mundshme me përfaqësuesit e BE-së në Kosovë me qëllim të zbatimit të marrëveshjeve të arritura.

Është paralajmëruar që së shpejti në pjesën veriore të Mitrovicës do të fillojë nga puna Zyra Administrative e Qeverisë së Kosovës. A paraqet ky hap rrezik për gjendjen e sigurisë atje?
Zyra do të fillojë të funksionojë dhe në të do të punësohet një numër i konsiderueshëm i punëtorëve. Sa na përket ne, policia do të përkujdeset, në kuadër të mandatit që ka, që ta sigurojë zyrën, në mënyrë që njerëzve t’ua mundësojë që të punojnë në këtë zyre pa kurrfarë problemi.