Merremi me çështje teknike e jo me ato politike

Për M-Magazine flet shefja e Zyrës Administrative të Qeverisë së Kosovës në pjesën veriore...Foto 1/1

Për M-Magazine flet shefja e Zyrës Administrative të Qeverisë së Kosovës në pjesën veriore të Mitrovicës, Adrijana Hoxhiq.

A është kompletuar Zyra me kuadro?
Mund t’ju them se tani në çdo departament kemi nëpunës të mjaftueshëm, të cilët mund t’i kryejnë punët e tyre. Rrethi i dytë i regrutimit të personelit ka përfunduar, intervistat me kandidatë janë mbajtur. Komisioni e ka finalizuar punën e vet, kështu që në fillim të javës së ardhshme do t’i njoftojë kandidatët me vendimet që janë marrë.

Çka është punuar deri më tash dhe cilat janë prioritetet për të ardhmen?
Ma merr mendja se e dini që procesi i rekrutimit nuk është aspak i thjeshtë. Pikë së pari kishte shumë kandidatë, kështu që është dashur ta shqyrtojmë me vëmendje çdo aplikim, me qëllim që t’u ofrojmë mundësi punësimi kandidatëve më të mirë. Ky proces merr shumë kohë. Procesi i rekrutimit ishte mjaft transparent. I kishim pesë anëtarë të komisionit, puna e të cilëve në vazhdimësi u mbikëqyr nga ana e ICO-së dhe DEMI/USAID-it.

Është interesant se deri më tash kemi pasur vizita të shumta të qytetarëve të veriut të Mitrovicës, të cilët na janë drejtuar me kërkesa të ndryshme. Disa prej tyre vinin vetëm për këshilla, disa për t’u informuar lidhur me punën e Zyrës, por pati edhe të tillë që interesoheshin për projektet e veta, për biznes të pavarur, të cilët kërkonin që t’ju ndihmonim në realizimin e ideve të tyre. Na janë drejtuar edhe disa familje, të cilat i paraqitën kushtet e tyre shumë të vështira jetësore.

Fjala është kryesisht për shtëpitë e tyre, kështu që kërkuan prej nesh që t’iu ofrojmë ndihmë në ndërtimin apo meremetimin e tyre. Krahas këtyre kërkesave individuale, qytetarët qysh më herët na janë drejtuar me kërkesat e tyre kolektive, si për shembull për rinovimin e kulmeve në ndërtesat publike, rinovimin e fasadave, asfaltimin e rrugëve, vendosjen e tubave të rinj të kanalizimit e të ujësjellësit e të ngjashme. Kam përshtypjen se me projektet e deritashme, të cilat i kemi realizuar, kemi dëshmuar para qytetarëve të këtushëm dhe para të tjerëve se ne na interesojnë vetëm çështjet teknike dhe se fare nuk përzihemi në politikë.

Vetë qytetarët kanë thënë se kjo që po bëjmë ne nuk ka të bëjë fare me politikë. Ja, për shembull, para disa ditësh personalisht e kam pranuar një projekt, të cilin e kemi financuar. Fjala është për rrugën tek Shkolla e Mjekësisë, e cila është rinovuar krejtësisht, duke përfshirë edhe ndërrimin e gypave që rridhnin me vite. Në fund kjo rrugë u asfaltua. S’di a e dini se kemi iniciuar shumë projekte, siç është fasada e ndërtesave përballë Krashit, jo moti është kompletuar rinovimi i fasadës në rrugën LLolla Ribari, parku i fëmijëve afër Bishevcit, parku në dy pjesë në rrugën që çon kah spitali, rinovimi i rrugëve dytësore në Lagjen e Boshnjakëve, rregullimi i mjedisit tek Tre Rrokaqiejt, asfaltimi i fushës së basketbollit në Mikronasele, rinovimi i shkallëve që çojnë tek përmendorja e shumë projekte të tjera me karakter social. Në plan e kemi që të vazhdojmë me këtë ritëm.

I kemi në plan disa projekte të infrastrukturës, të cilat do t’i realizojmë relativisht shpejt. Krahas projekteve të infrastrukturës, në fazën përgatitore kemi edhe projekte tjera, për shembull që t’iu ndihmojmë familjeve skamnore në forma të ndryshme, dëshirojmë që t’i mbështesim iniciativat që kanë të rinjtë e pjesës veriore të Mitrovicës, planifikojmë që t’i gëzojmë edhe qytetarët më të rinj të pjesës veriore të Mitrovicës, mirëpo për këtë do të flasim në ndonjë rast tjetër. Desha të them se ekzistojnë mundësi të shumta, andaj qytetarët duhet t’i shfrytëzojnë ato që u takojnë dhe unë u bëj thirrje që drejtpërdrejt t’i drejtohen Zyrës, ngase ne jemi këtu që t’iu shërbejmë atyre, pra qytetarëve të pjesës veriore të Mitrovicës.

A janë kërcënuar nga ndokush ndonjë i punësuar në këtë Zyrë?
Përveç deklaratave publike të individëve, të cilët qëllimisht përhapin dezinformata për qëllimet që ka hapja e kësaj Zyre, si dhe të disa thirrjeve anonime që u janë drejtuar dy të punësuarve në Zyrën Administrative në pjesën veriore të Mitrovicës, kërcënime tjera serioze nuk ka patur.

Çka është ndërmarrë me këtë rast?
Nuk ka pasur nevojë për kurrfarë masash të posaçme. Pra, për çdo formë të dhunës janë organet kompetente që merren me këto çështje. Nënçmimet dhe kërcënimet nuk do t’i heshtim, sado që nuk janë diçka që mund të na ndalin në punën tonë, ngase 100 për qind jemi të sigurt se nuk po e rrezikojmë askë, kështu që, duke pasur parasysh këtë fakt, kërcënimet dhe nënçmimet nuk kanë kurrfarë kuptimi. Ne përfundimisht do të përpiqemi që të krijojmë kushte më të mira jetese për qytetarët që jetojnë në pjesën veriore të Mitrovicës. Qysh si Ekip përgatitor patëm hequr dorë nga politika dhe ua patëm lënë atyre që dëshirojnë të merren me të.

Cili do të jetë projekti i parë i madh që kjo Zyrë planifikon ta implementojë në Mitrovicë?
 Siç iu thashë, kemi planifikuar projekte të shumta në infrastrukturë. Do të përpiqemi të gjejmë mënyra që në konsultim me qytetarët t’i caktojmë prioritetet e duhura. Për këtë, natyrisht, do t’ju njoftojmë me kohë.

Si e shihni vazhdimin e dialogut Beograd – Prishtinë dhe çka prisni nga ky proces?
Dialogu Beograd – Prishtinë është i një rëndësie të jashtëzakonshme. Konsideroj se politika duhet të udhëhiqet pikërisht në këto nivele. Në këtë proces, natyrisht, rolin e vet duhet ta kenë edhe politikanët lokalë të këtij mjedisi. Pres dialog më të hapur e më të sinqertë, marrëveshje që popullatës ia lehtëson jetën e jo aso që ia vështirëson atë, marrëveshje që marrin parasysh standardet e njerëzve që jetojnë këtu, ngase disa nga marrëveshjet e arritura më parë janë jashtëzakonisht të shtrenjta për xhepin e qytetarëve tanë. Kam vërejtje edhe në përzgjedhjen e temave për bisedim. Pra, ekzistojnë aq shumë çështje të pazgjidhura, zgjidhja e të cilave është emundur, për të mos thënë e lehtë, që për qytetarët në terren do të thoshin shumë.

Cilat i keni identifikuar si problemet më të mëdha në Mitrovicë dhe si do t’i zgjidhni ato?
Problemet apo vështirësitë në pjesën veriore të Mitrovicës, për të cilat po flasim ne, i kanë identifikuar vetë qytetarët e ato janë: ujësjellësi, energjia elektrike, numri i madh i plehrishtave gjithkund nëpër qytet, mungesa e objekteve sportive e kulturore, infrastruktura e keqe ekzistuese, papunësia, numri i pamjaftueshëm i objekteve shkollore ( s’di a e dini se disa shkolla punojnë edhe në tri ndërrime), mungesa e qendrës adekuate të tregtisë, problemi me parkingje...Për shumicën e këtyre problemeve ka zgjidhje përkatëse dhe ne kemi mundësi dhe mjete që t’i zgjidhim këto probleme.

Sa është fondi financiar i ndarë për këtë Zyrë dhe a mjafton ai për zgjidhjen e problemeve që i keni identifikuar?
Zyra ka fond të garantuar dhe përveç këtij fondi ekzistojnë mundësi të mëdha për fonde shtesë nga jashtë, të cilat mjete do të na e mundësonin që shumë probleme t’i zgjidhim përgjithmonë dhe kënaqshëm.