Është shtuar numri i fëmijëve në Çerdhe

Në entin parashkollor “Danica Jaramaz”, në pjesën veriore të Mitrovicës, që nga...Foto 1/1

Në entin parashkollor “Danica Jaramaz”, në pjesën veriore të Mitrovicës, që nga fillimi i gushtit janë regjistruar mbi dyqind vogëlushë, prej të cilëve 50 do ta ndjekin programin e plotë parashkollor, kurse të tjerët do ta ndjekin programin katërorësh.

Mitrovicë – Numri i fëmijëve të regjistruar në Çerdhen e Mitrovicës “Danica Jaramaz” është shtuar për rreth 30 për qind, krahasuar me vitin e kaluar, çka do të thotë se Çerdhja sivjet do t’i ketë rreth 600 fëmijë. Nga 1 korriku i këtij viti, çmimi i shërbimeve në këtë institucion është ngritur   ( 3 në 4 mijë dinarë ) rreth 35 euro. Regjistrimi për vitin shkollor 2012/2013 zgjat deri më 24 gusht. Kapaciteti i këtij institucioni, së bashku me aneksin e ri, është për rreth 250 vogëlushë.

Duke pasur parasysh se numri i fëmijëve është rritur për 25 deri 30 për qind në krahasim me vitin e kaluar, do të thotë se do të pranohen më shumë fëmijë se sa është kapaciteti i këtij objekti. Mirëpo, në këtë institucion thonë se asnjë fëmijë i interesuar nuk do të mbetet pa u regjistruar në këtë vit shkollor, se do të bëjnë përpjekje që t’i kënaqin kërkesat e prindërve, por njëkohësisht i lusin për mirëkuptim dhe nëse planifikojnë që fëmija i tyre të fillojë të vijë në Çerdhe vitin e ardhshëm që fletëparaqitjen për regjistrim ta dorëzojnë deri më 24 gusht dhe që ta bëjnë rezervimin në mënyrë që fëmija i tyre ta ketë vendin e vet.

Regjistrim plotësues nuk do të ketë pikërisht për shkak se vitin e kaluar kanë pasur probleme të shumta me prindërit, të cilët gjatë gjithë vitit bënin kërkesa për regjistrimin e fëmijëve të tyre. Gjatë shtatë viteve të fundit çmimi i shërbimeve në këtë institucion parashkollor nuk është ngritur, pra ka qenë (3 mijë dinarë ) rreth 30 euro në muaj. Mirëpo, për shkak të kursit të euros, janë detyruar që nga 1 korriku ta ngritin çmimin e shërbimeve.Kjo shumë deri diku është e mjaftueshme për mbulimin e shpenzimeve themelore, përderisa Kuvendi Komunal i heq shpenzimet tjera, pra 70 për qind të tyre, të cilat mjete nevojiten për të funksionuar ky institucion parashkollor.

Ata me xhepa të thellë konsiderojnë se kjo shumë nuk është e lartë, kurse ata me të ardhura të ulëta, sidomos ata të cilët punojnë në sektorin privat e që punën nuk e kanë të sigurt, konsiderojnë se çmimi ka mundur të mbetet i njëjtë, mbase edhe më i ulët. Radovan Petroviq ka dy fëmijë. Ai thotë se kjo shumë që duhet paguar për shërbimet në Çerdhe i shkakton probleme të konsiderueshme, mirëpo opsion tjetër nuk ka. “Djalin e kam në Çerdhe që nga viti i kaluar, kurse vajza shkon sivjet. Problemi është se si unë si bashkëshortja ime punojmë në sektorin privat, ku rrogat nuk janë edhe aq dhe ku askush nuk na garanton se aty do të punojmë gjatë, ngase pronari mund të na largojë nga puna kur t’i teket. Mirëpo, për fëmijë nuk ka kush të kujdeset, andaj po arnohemi disi.

Ashtu siç duhet të kemi para për ushqime, po ashtu duhet të kemi edhe për Çerdhe”, thotë ai. Nga ana tjetër, Marijana Saviq është në një situatë më të mirë financiare e meqenëse ka vetëm një fëmijë, atëherë edhe shpenzimet i ka më të vogla. “Burri im dhe unë kemi rroga solide, prandaj edhe me gjithë këtë shtrenjtim të shërbimeve në Çerdhe nuk kemi problem. Por e kuptoj se ka mjaft prindër me të ardhura shumë më të ulëta e që kanë nga dy, madje edhe nga tre fëmijë e më tepër. Kur merret parasysh ky fakt, nëse nuk keni të ardhura të mira, atëherë vërtet është vështirë”, thotë ajo.

Institucioni parashkollor “Danica Jaramaz” e ka mbështetjen nga vetëqeverisja lokale. Mirëpo, meqenëse është fjala për kategorinë më të ndjeshme të popullatës dhe kur merret parasysh numri i madh i fëmijëve – mbi 500 vogëlushë do të vendosen në Çerdhe, në këtë institucion shpresojnë që Ministria e Arsimit dhe Zyra për Kosovën t’u dalin në ndihmë dhe t’iu ndihmojnë në zgjerimin e objektit, si dhe në punësimin e më shumë punëtorëve arsimorë, në mënyrë që mësimi këtu të jetë sa më kualitativ.