Përmes kurseve përfitojnë nga nxënësit

Mitrovicë - Mbajtja e kurseve private nga mësimdhënësit për lëndët e tyre dhe me nxënësit...Foto 1/1

Mitrovicë - Mbajtja e kurseve private nga mësimdhënësit për lëndët e tyre dhe me nxënësit e tyre që i ndjekin mësimin në shkollat publike është veprim korruptiv i cili me ligjet në Kosovë paralizohet.

Në një vend ku ka rregull dhe sundon ligji një gjë e tillë do të ndalohej rreptësishtë sepse përveç tjerash në sensin më të butë është edhe konflikt i interesit.
 
Megjithatë në Mitrovicë dukuria e kurseve me qëllim përfitimi nga ana e mësimdhënësve është bërë diçka normale. Kurset e tilla ku përveç orëve mësimore të obligueshme në shkollë, vijojnë edhe kurse të ndryshme që organizohet nga mësimdhënësi i njëjtë nga shkolla publike  tingëllon krejtësisht se bëhen  vetëm për përfitime të arsimtarëve e jo në dobi të nxënësit, sepse rrallë herë janë mundësitë financiare për kurse të tilla. Çmimet për vijimin e kurseve të tilla janë të larta, duke marrë parasysh pagat dhe papunësinë në vendin tonë.

S.G., nxënëse e klasës së XII në gjimnazin ‘Frang Bardhi’ në Mitrovicë, thotë se për fat të keq, ka raste kur nxënësit nëse nuk shkojnë në kurs te arsimtari i caktuar, nuk mund ta kalojnë lëndën, ose nuk marrin nota të dëshiruara, edhe pse i meritojnë ato. Sipas saj, një gjë e tillë ndodhë me lëndën e gjuhës angleze. “Edhe pse të njëjtën lëndë mësimore e ndjek në shkollë, nga po i njëjti profesor, ti duhet patjetër të vijosh kurs tek ai nëse dëshiron notë kaluese, kjo ndodhë edhe tek nxënësit e dalluar”, ka thënë S.G. Ajo pranon se është duke vijuar dy kurse dhe paguan 50 euro në muaj, por nuk zbulon lëndët dhe as arsimtarët e këtyre kurseve. “Edhe pak sa ta përfundoj
shkollën e mesme ju tregoj të gjitha”, tha ajo, e ndrojtur nga hakmarrja e profesorëve nëse përmend emra.

Artan Istrefi, nxënës i shkollës së mesme ekonomike, ka thënë se mbajtja e këtyre kurseve thuajse është shndërruar në një biznes për shumicën, e jo në favor të nxënësve, por në përmbushje të kërkesave financiare të arsimtarëve. Sipas tij, kurse të tilla mbajnë arsimtarët e shkollës së muzikës, shkollave të tjera të mesme, madje edhe të shkollave fillore, duke përfshirë këtu edhe mësueset e ciklit të ultë.
“Gati çdo here iu vihet përgjegjësia nxënësve për shumicën e gjërave, mirëpo jo gjithçka është në atë mënyrë që ne e paramendojmë, sepse në shumicën e rasteve nxënësit janë viktimat e vetme”, tha Istrefi. Ai theksoi se kjo vërehet edhe nëpër testet e maturës shtetërore, ku për çdo vit gati gjysma e nxënësve nuk mund ta kalojnë testin, duke mos pasur mundësi pranimi në universitet. “Kjo dëshmon më së miri të arriturat e kurseve dhe arsimit tek ne, ku shumica e profesorëve punojnë për përmbushjen e qëllimeve të tyre financiare, jo për një brez të denjë e të shkolluar”, tha ai, duke shtuar se edhe pse thuhet se rinia është e ardhmja e vendit, ardhmëria e tyre po cenohet pothuajse në çdo aspekt.

Ndërkaq, prindërit e nxënësve shprehen të habitur se si asnjëherë nuk kontrollohen kurse të tilla nga njerëz kompetentë.
“Inspektorët e arsimit duhet të kontrollojnë në bazë të asaj se në çfarë kushtesh punohet dhe çfarë kualiteti prodhojnë këto kurse”, ka thënë Sanije Pllana, prind, që nuk ka lejuar vajzën e saj të vijojë asnjë kurs, duke dyshuar në kualitetin e mësimit nëpër këto kurse. Sipas saj, kurset e organizuara nga mësimdhënës të caktuar, bëhen kryekëput për përfitime materiale të mësimdhënësve.

Në anën tjetër, zyrtarë të arsimit në Mitrovicë, kanë thënë se kurse të tilla ndonjëherë edhe nuk mund të kontrollohen, sepse shumica e tyre mbahen në shtëpi private të profesorëve.

Isa Sejdiu, zyrtar në Drejtorinë e Arsimit, thotë se me ligj nuk është e përcaktuar mbajtja e kurseve nga ana e profesorëve. Sipas tij, diçka që nuk është e ndaluar, është e lejuar, ndërsa kritikon profesorët të cilët mbajnë kurse për të njëjtët nxënës të cilëve u japin mësim edhe në shkollë. Ai theksoi se nuk ka vërejtur që në objekte shkollore të ketë mbajtur ndonjë profesor kurs privat. “Një nga arsyet kryesore të mbajtjes së kurseve të tilla në shtëpitë private të profesorëve është edhe mos kryerja e obligimeve ndaj shtetit, sepse ushtrimi i një biznesi, nënkupton kryerjen e obligimeve ndaj shtetit”, ka thënë Sejdiu.